Special birthday Visit at Ambedham ambaji godhara, bayath and modkuba moder jam modpir

આજ રોજ પરમ મિત્ર, સખા, ભાઈ, દોસ્ત, ફ્રેન્ડ, જીગરી, એવાં બંધુ ઓલ ઈન વન શિવરાજ સિંહ વાઘેલાના જન્મદિવસ અને રામજન્મભૂમિ મંદિર શિલાન્યાસના પાવન દીને શિવાજીની ઘણાં સમયની ઈચ્છા હતી મોડકુબા મોડપીર દાદા મંદીરની મુલાકાત લેવાની.

આજના દીને ઈ બીડું ઝડપ્યું.
સાંજે ચાર વાગે ગામ ફરાદીથી સૌ પ્રથમ પહોંચ્યા અંબેધામ ગોધરા.
જ્યાં કોરોનાની તકેદારીના ભાગરુપે ટેમ્પરેચર ગનથી તાપમાન માપી અને સેનેટાઈઝર દ્વારા સેનેટાઈઝ થઈને મંદિરમાં માતાજીના દર્શન કર્યા.
આ કપરા કાળમાં અને કચ્છમાં ઝડપથી વધતાં કેસોને લઈને મંદિર દ્વારા ઉત્તમ વ્યવસ્થા કરી છે.
અંબેધામ મંદિર ગોધરા એટલે તમને આકર્ષિત કરતી જગ્યા.
સફેદ સંગેમરમર (આરસપહાણ-માર્બલ)થી શોભતો મંદિરનો ફ્લોર લૈપીડરી કલા નહીં પરંતુ પચ્ચીકારી કલાથી (રંગીન મીણાઓ જડીને) સજાવવામાં આવેલ છે.
જે ખરેખર સુંદર અને અદભૂત અનુભૂતિ આપે છે.
મંદિરના ગર્ભગૃહમાં માતા અંબાજી શોભાયમાન છે તો મુખ્ય મંડપનો ઉપરનો ભાગ વિશાળ ઝુમ્મર અને રંગબેરંગી સોનેરી કાચની કલાથી દિવ્ય અનુભૂતિ કરાવે છે.
મંદિર પરિસરમાં અન્ય પણ ઘણાં આકર્ષણો છે.
કચ્છની મુલાકાત લેતાં લોકોએ એક વાર મુલાકાત ચોક્કસ કરવી, બીજીવાર તમે ખૂદ દોડી આવશો.
પ્રશાસન અને ધારાસભ્યશ્રીને પણ અનુરોધ છે કે તેઓ દ્વારા લાયજા-ગોધરા રોડને ડબલ લેન કરવામાં આવે અને બંને બાજુથી બાવળની ઝાડી દૂર કરવામાં આવે.
જય અંબે.
અંબેધામ ગોધરાથી આગળની મુસાફરી મોડકુબાની હતી.

આ દરમિયાન રસ્તામાં બાયઠ ગામ પાસે પાળિયાઓને જોયા.
પાળિયાની અવદશા અને ઉપેક્ષા ખૂબ દુઃખ જન્માવનારી હતી.
તેમાં અમુક વિશિષ્ટ પાળિયા જોવા મળ્યા. આ ઉપરાંત કચ્છ ઈતિહાસમાં ઉલ્લેખનીય રુગા(રુડા)જોષીનોં પાળિયો જોયો.
ફરાદીના ઈતિહાસ સાથે સંકળાયેલ પાળિયોના મળતાં મોડકુબા જતાં રસ્તામાં કચ્છ ઈતિહાસના જાણકાર, સંશોધનકર્તા અને લેખક એવાં પ્રમોદભાઈ જેઠીને તેમણે લખેલ પાળિયા લેખ બાબત ટેલિફોનિક વાતચીતમાં તે પાળિયાઓ સોદેવપીર દાદાની જગ્યાની આસપાસ છે તે જાણવા મળ્યું.
એટલે રીટર્નમાં મુલાકાતનું મન બનાવી પહોંચ્યા સીધા મોડકુબા.
દાદા મોડેર જામના દરબારમાં.
કચ્છના ઈતિહાસનું અમરપાત્ર અને લોકદેવતાં- મોડપીર તરીકે ઓળખાય છે.
આ મોડપીર દાદાનું એક નાનું મંદિર મારા ગામ ફરાદીની સીમ વિસ્તારમાં આવેલ છે.
મોડકુબા અને આસપાસના ગામો મોડ ચોવીસી તરીકે ઓળખાય છે જેમાં 12 ગામ કચ્છમાં અને 12 ગામ જામનગર જિલ્લામાં છે.
દાદાની સમાધી પર જુની છત્તેડીના સ્થાને આજે એક ભવ્ય અને દિવ્ય મંદિરનું નિર્માણ થાય છે.
પ્રાંગણમાં કેટલાક પાળિયાઓને કાળની થપાટો અને દરીયાઈ ભેજયુકત હવાએ સાવ જર્જરીત કરી મૂક્યા છે.
એક જુની છતેરીમાં હાલ મધ્યમાં રાજાશાહી તોપ રાખવામાં આવેલ છે. જે તેનાં વહન સાધન સાથે સાબૂત હાલતમાં છે.
જ્યાં એક નાનો તોપનો ગોળો જોયો જે મોટેભાગે નાળિયેર ફોડવાના કામમાં વપરાય છે.
એક સમયે વિશાળ ગઢના ફુરચા ઉડાડી દેતો ગોળો આજે નાળિયેરના ફુરચા ઉડાડે છે.¡¡
આ ઉપરાંત એક 18-20 કિલો વજન ધરાવતો નક્કર ધાતુનો તોપનો ગોળો પ્રાંગણની રેતીમાં પડ્યો હતો.
કુતૂહલવશ સહજ રીતે ઉપાડવા જતાં તે ખૂબ વજનદાર નિકર્યો.
સ્થાનિક યુવાનને આ ગોળો અંહી રેતીમાં સાવ ઉપેક્ષિત કેમ પડ્યો છે તેવાં પશ્ર્નના ઉત્તરમાં અમે તેનો મલ તરીકે કે કસરતના એક સાધન તરીકે ઉપયોગ કરી છીએ તેવું જણાવ્યું.
આજે સારા સારા મ્યુઝિયમમાં પણ આ આકાર અને વજનનો તોપનો ગોળો જોવા મળતો નથી ત્યારે આ ઉપેક્ષિત ગોળાની સ્થિતિ રાજાની દયનીય સ્થિતિ જેવો લાગ્યો!!
આ ઉપરાંત ડેલી, ગેટ, અને એક મોટો કોઠો-ગઢ અને તેનાં પર લહેરાતી સફેદ ધર્મની ધજા.
મંદિરનું નિર્માણ કાર્યનું કામ ચાલું છે.
મંદિર ખૂભ ભવ્યતા અને ઉત્તમ ભારતીય સ્થાપત્ય કલા મુજબ કોતરણી યુક્ત બને છે.
આ મંદિર બીજા ગામોમાં મંદિર બનાવવા માંગતાં ગામો માટે ઉત્તમ નમૂનો છે.
મંદિરની બાજુમાં નાકર બ્રાહ્મણની સમાધી પણ આવેલ છે.
અંહીના મંદિરની એક એક દિવાલ અને પથ્થર જાણે જીવંત કોઈ કલાકૃતિ હોય તેવાં લાગતાં હતાં!!
આ મંદિરની દિવ્યતાથી પ્રસન્ન થઈ પરિસરને રામ રામ કરી નિકળી પડ્યાં પાછાં બાયઠના રસ્તે.

બાયઠ ગામમાં જતાં જ જમણાં હાથ પર સોદેવપીરની જગ્યા હતી. આ સોદેવપીર એટલે રુપાદે-માલદે જે રાજસ્થાનના હતાં.
જેમણે જેસલ જાડેજાને સૌ પ્રથમ પીર તરીકે સંબોધી પીરની ઉપાધિ આપી હતી.
લોક માન્યતા મુજબ સ્વ:દેહ સમાધી લીધી એટલે સોદેવપીર તરીકે ઓળખાય છે.
અહીં પરિસરમાં અન્ય પણ કેટલીક સમાધીઓ આવેલ છે.
આ ઉપરાંત ત્રણ જુની છતેરી અને 8-9 પાળિયાઓ આવેલ છે.
જેમાં બે પાળિયા ચારણના છે તો એક પાળિયો કલોજીનો છે.
આ ઉપરાંત એક છતેરીમાં એકસાથે ત્રણ પાળિયાઓ છે જે ફરાદીના ઈતિહાસ સાથે સંકળાયેલા હોવાની પૂરી સંભાવના છે.
આ પાળિયાની સાફસૂફી પછી વંચાય તેવી સ્થિતિ બની શકે છે.
પરંતુ સમયનો અભાવ અને થયેલ અંધારાએ અમને મજબૂર કર્યા.
બીજી વાર મુલાકાતના મન સાથે અંહીથી વિદાય લીધી.
આ સમયે જાણવા મળ્યું કે આવા તો કેટલાય પાળિયાઓ બાયઠની આસપાસ આવેલા છે ઉપરાંત ફરાદીની જેમ અંહી પણ સાત ગામ ભાંગી એક ગામ વસેલ છે તેવી થીયરી મળી.
અતિતમાં અંહી ખૂબ ધીંગાણા થયાં હશે તેના પુરાવા તો હાઈવે પાસે આવેલ 25-30 પાળિયાઓએ જ આપી દીધાં હતાં.
અંહીથી બંદરીય નગર માંડવીના રસ્તે ફરાદી પહોંચી યાત્રાને વિરામ આપ્યો.
આજ રોજ 3 પીરના દર્શનનો લ્હાવો મળ્યો.
સવારે ફરાદીના રામદેવપીર પગલાં મંદિરના  દર્શન કર્યા.
ત્યાર પછી સાંજે મોડપીર દાદા અને સોદેવપીર દાદાના દર્શનનો લાભ મળ્યો.
શિવરાજસિંહના બર્થ ડેની વિશિષ્ટ ઉજવણી આ રીતે પૂર્ણ કરી.
હેપ્પી બર્થ ડે શિવાજી.
અન્ય માહિતી અને ફોટોગ્રાફ માટે મુલાકાત કરો.
અંગ્રેજીમાં લખવું www.પીઆરજાડેજા. કોમ
અમુક શુભ હીતેચ્છકોના કારણે ફેસબુક પર સાઈટ લીંક પ્રાપ્ય નથી બનતી.
કામ ચાલુ છે.
બધાંને જય માતાજી..🙏🇮🇳